ئشق
ئشق چه‌نی قه‌وم نزیکمانه
ئشق وه گشت لاوه شه‌ریکمانه
ئشق چه‌نی خیون مِ جوشی له‌لی
دل چه‌نی دیوانگی دوشی له لی
ئشق چه‌نی میورگ که‌و ها قه یا
گشتی هه‌ساره‌گان شه‌و ها قه‌یا
ئشق پری له خوه‌زیوه‌یل دیوره
ئشق پری له ئه‌زره‌ته یل و هیوره
ئشق ئه‌وه‌س که له‌رزنیدن دلد
هیور که‌سی دامه‌رزنیدن دلد
وه‌ختی چه‌ود چوده هه‌ناز مالیگ
وه هه ر که دیونیدن گری هه‌والیگ
ئشق چه‌نی ئه‌زیز خاسمانه
ئشق چه‌نی ره‌فیق راسمانه
ئشق چه‌نی پر ملی ملوانکه
ئشق چه‌نی پر ده سی کلوانکه
ئشق وه‌ره‌و کیوچه و که‌ل به‌یدنه‌د
گورای گور ئه‌و هیور که سیگ خه یدنه د
ئشق هه‌میشه ها سه‌ر قه‌راره‌یل
ها له ناو دل چه‌و ئنتزاره‌یل
شه‌یو سفید و قرمزیگ ها وه‌ری
ده‌ور مل سه‌وز و که‌ویگ ها سه‌ری
ئشق هه‌میشه ها له ناو مالمان
یا خه‌فتیه له ژیر سای داره‌گان
یا نیشتیه وه ئاسمان لای خدا
یا هاله ناو ده‌سه‌یل ده‌س ئه‌و دوئا
ئشق هه‌میشه په‌رده‌گان له‌رزنی
ده‌روه‌چه‌گان وه ریشگه‌و هه‌ل که‌نی
هه‌ر شه وه کی هه‌ر چی گوله ئاو ده‌ی
وه‌چکه مه‌لیوچگه‌یل که‌و تاو ده ی
ده‌مچو هه‌ر چی جیویجگه‌یله شوری
وه هه‌ر چی گلدانه وه نازه‌و نوری
ئشق هه میشه ها له ناو چه‌وه‌یلد
هه‌ر شیونید ناز خوه‌ش خه‌وه‌یلد
هیورد هه‌میشه ها له مال ئه‌وانه
خه‌و وه چه‌وه‌یلده‌و نیه‌تی شه‌وانه
ئشق ئه‌گه‌ر نه‌ود خدا هاله کوو
زیوخ و خه‌م و ده‌رد و به‌لا ها له کو
